Irani shpall forcat detare dhe ajrore të BE-së organizata terroriste

Irani ka shpallur forcat detare dhe ajrore të të gjitha shteteve anëtare të Bashkimit Evropian si organizata terroriste, pasi blloku shtoi Trupat e Gardës Revolucionare Islamike (IRGC) në listën e organizatave terroriste.

Ministria e Punëve të Jashtme e Iranit njoftoi se ky veprim “reciprok” vjen pas vendimit “të paligjshëm dhe të pajustifikuar” të shteteve anëtare të BE-së për të caktuar një pjesë të Forcave të Armatosura të Republikës Islamike, raporton Iranian TV Press.

Shtohet se shtetet anëtare të BE-së e kanë përcaktuar IRGC-në, e cila njihet si një nga shtyllat e forcave të armatosura iraniane, si një organizatë terroriste, “në kundërshtim me parimet dhe rregullat themelore të Kartës së Kombeve të Bashkuara dhe të drejtës ndërkombëtare”.

“Bazuar në parimin e veprimit reciprok dhe ligjin parlamentar, qeveria iraniane është e detyruar të përgjigjet me masa ligjore proporcionale “, thekson deklarata.

Ministria iraniane iu referua një ligji të miratuar nga parlamenti iranian në prill 2019, i cili përcakton se të gjitha vendet që në çfarëdo mënyre ndjekin ose mbështesin vendimin e Shteteve të Bashkuara të Amerikës për ta përcaktuar IRGC-në si një organizatë terroriste do t’i nënshtrohen masave reciproke.

Bashkimi Evropian e ka shtuar IRGC-në në listën e organizatave terroriste në përgjigje të shtypjes së protestuesve nga Irani, të cilët kanë shkaktuar trazira në të gjithë vendin në protestat e fundit.

“Terroristë të armatosur dhe protestues, të mbështetur nga vendet e huaja, morën kontrollin e protestave paqësore dhe sporadike për shkak të problemeve ekonomike më 8 dhe 9 janar dhe i shndërruan ato në vende vrasjesh, duke djegur xhami, klinika, ambulanca, autobusë udhëtarësh dhe duke shkatërruar pronën publike dhe private”, thuhet në deklaratë.