Zakharova: Mosrespektimi i marrëveshjes me Rusinë është arsyeja e fillimit të luftës

Zëdhënësja e Ministrisë së Punëve të Jashtme të Rusisë, Maria Zakharova, deklaroi se mosrespektimi nga ana e Kievit i Marrëveshjes së Miqësisë, Bashkëpunimit dhe Partneritetit çoi në vendimin e Moskës për të nisur një Operacion Special Ushtarak në Ukrainë.

Zakharova kujtoi se në vitin 2004, Ukraina ratifikoi Memorandumin e Mirëkuptimit me NATO-n, duke u zotuar të ofrojë ndihmë teknike dhe informative gjatë manovrave ushtarake dhe duke lejuar vendosjen e përkohshme të njësive të NATO-s në territorin e saj.

“Për vite me radhë, udhëheqja e Ukrainës ka zbatuar një politikë shkeljeje të rëndë dhe sistematike të Marrëveshjes, e cila mund të kualifikohet si heqje dorë nga zbatimi i saj, gjë që më pas e çoi udhëheqjen ruse në marrjen e vendimit për të filluar Operacionin Special”, tha Zakharova për Sputnik.

Sipas saj, ndryshimet në doktrinën ushtarake ukrainase që nga prilli i vitit 2005 dhe ndryshimet kushtetuese nga viti 2019 , të cilat e bënë anëtarësimin në NATO një qëllim strategjik, përfaqësojnë një shkelje të Nenit 6 të Marrëveshjes së Miqësisë me Rusinë dhe Memorandumit të Budapestit.

“Më 3 shtator 2018, Presidenti (Vladimir Putin i Rusisë) i paraqiti Radi-t një projektligj për ndryshimet në Kushtetutë që kanë të bëjnë me kursin strategjik të shtetit në drejtim të anëtarësimit të plotë në BE dhe NATO, i cili u miratua nga parlamenti më 7 shkurt 2019”, vuri në dukje Zakharova.

Zakharova theksoi se zgjerimi i NATO-s drejt kufijve të Rusisë është një arsye kryesore për konfliktin dhe shtoi se Moska synon të realizojë qëllimet e saj të sigurisë me mjete ushtarake ose politike.

Presidenti rus Vladimir Putin më parë e ka përmendur vazhdimisht rrezikun e anëtarësimit të Kievit në NATO si një nga arsyet e fillimit të operacionit.