Shkak borxhi në rritje, “Ineos” e miliarderit Jim Ratcliffe në bisedime për të shitur pjesë të biznesit

Kompania kimike në pronësi të miliarderit Jim Ratcliffe është në bisedime për të shitur pjesë të biznesit me shpresën e mbledhjes së qindra miliona paundëve për të përballuar borxhet e saj në rritje. Sipas një raporti, bisedimet janë në një fazë të hershme, por janë përqendruar në shitjen e aseteve nga biznesi i Ratcliffe.

Grupi Ineos po përpiqet të ulë kostot dhe borxhet e tij mes një rënieje të zgjatur në industrinë globale kimike. Dy kompanitë më të mëdha në perandorinë e Ratcliffe, Ineos Group Holdings dhe Ineos Quattro Holdings, së bashku kishin më shumë se 18 miliardë paund hua në fund të vitit të kaluar, një rritje prej gati 3 miliardë paundësh krahasuar me një vit më parë.

Kompania është në bisedime me firmat e kreditit për të rifinancuar obligacionet që pritet të maturohen vitin e ardhshëm, sipas raportit. Ai shtoi se aksionarët i kishin shtuar 200 milionë euro kapital të ri në biznes në javët e fundit, së bashku me mbledhjen e 300 milionë eurove të tjera financimi.

Ratcliffe, i cili i ka përshkruar taksat e karbonit si “taksat më idiote në botë”, ka fajësuar axhendën klimatike dhe politikat tregtare të Evropës për shumë nga problemet me të cilat përballet biznesi i tij.

Ai e zhvendosi rezidencën e tij tatimore në Monako në vitin 2020 dhe këtë muaj u detyrua të kërkonte falje për akuzuat e tij se emigrantët kanë kolonizuar Britaninë dhe se ata marrin përfitime nga fondet publike.