Erdogan shpreh ngushëllime për Khamenein dhe viktimat e sulmeve në Iran

Presidenti turk Recep Tayyip Erdogan ka shprehur ngushëllimet e tij për popullin iranian pas sulmeve që çuan në vdekjen e liderit suprem të Iranit, Ayatollah Ali Khamenei.

Në një deklaratë për shtyp, Erdogan tha se, në emër të Turqisë dhe kombit turk, i shpreh ngushëllimet më të sinqerta familjeve të viktimave dhe lutet për mëshirën e Zotit mbi ata që humbën jetën, duke përfshirë edhe Khamenein.

Ai përshkroi popullin iranian si miq dhe vëllezër, me të cilët Turqia ka jetuar në paqe që nga viti 1639.

“Ne kemi jetuar pranë njëri-tjetrit në paqe për shekuj. Inshallah, do të vazhdojmë të jetojmë pranë njëri-tjetrit me paqe dhe qetësi edhe për shumë shekuj të tjerë”, u shpreh ai.

Presidenti turk vuri theksin tek nevoja për të siguruar armëpushim dhe hapur dyert për dialog. Ai paralajmëroi se, nëse nuk ndërhyhet në kohë, procesi i konfliktit do të ketë pasoja serioze për sigurinë rajonale dhe globale.

“Askush nuk mund të përballojë pasiguritë ekonomike dhe gjeopolitike që një konflikt i tillë do të krijonte. Prandaj, zjarri duhet të fiket para se të rritet më tej”, tha Erdogan, duke bërë thirrje për veprim të menjëhershëm dhe për mbrojtjen e stabilitetit në Lindjen e Mesme.