Franca: Rreth 50 anije franceze të “bllokuara” për shkak të krizës së Iranit

Ministri francez i Transportit tha se rreth 50 anije, që mbajnë flamurin francez ose u përkasin kompanive franceze, kanë ngecur në rajonin e Gjirit Persik për shkak të mbylljes de facto të Ngushticës së Hormuzit dhe tensioneve të vazhdueshme në rajon.

Mbyllja – e cila është shkaktuar nga kërcënimet dhe operacionet në kontekstin e konfliktit me Iranin – ka bërë që shumë kompani transporti detar të shmangin tranzitin përmes këtij korridori kyç të tregtisë detare.

Ndërkohë, Sri Lanka nisi transportimin e më shumë se 200 marinarëve nga një anije iraniane në breg të hënën, pasi anija kërkoi ndihmë ndërsa ishte ankoruar jashtë ujërave territoriale të vendit, raportoi AP.

Ky veprim vjen mes tensioneve në rritje në Oqeanin Indian, pas fundosjes së një anijeje luftarake iraniane nga një nëndetëse amerikane.

Një zëdhënës i marinës së Sri Lankës tha se marinarët e IRIS Bushehr fillimisht po transferohen në portin e Kolombos, ndërsa anija më vonë do të zhvendoset në një port në ishull.

“Zbarkimi është duke u zhvilluar”, tha ai, duke shtuar se marinarët do të transferohen në një bazë detare rreth 20 kilometra në veri të Kolombos.