Zgjidhet pasuesi i Khamenei, emri mbahet sekret. Izraeli: Do asgjësojmë çdo të përzgjedhur

Zgjidhet pasuesi i Khamenei, emri mbahet sekret. Izraeli: Do asgjësojmë çdo të përzgjedhur

Struktura e posaçme për zgjedhjen e liderit të ri suprem të Iranit ka marrë një vendim, bënë të ditur ditën e diel anëtarët e saj, të cilët megjithatë nuk e bënë publik emrin e të përzgjedhurit.

“Kandidati më i përshtatshëm, i aprovuar nga shumica e anëtarëve të Asamblesë së Ekspertëve, është caktuar”, deklaroi Mohsen Heydari, anëtar i trupës përzgjedhëse që përfaqëson provincën e Khuzestanit.

Një tjetër anëtar, Mohammad Mehdi Mirbagheri konfirmoi në një video të transmetuar nga agjencia e lajmeve “FARS” se “një vendim i palëkundur që reflektonte vullnetin e shumicës ishte marrë tashmë”.

Lideri suprem iranian zgjidhet nga organi me 88 anëtarë, të gjithë klerikë të hershëm, të cilët zgjidhen me votë popullore.

Por ushtria izraelite ka reaguar duke paralajmëruar Republikën Islamike se do të vazhdojë të përndjekë çdo pasardhës të liderit të ndjerë, Ali Khamenei.

Në një postim në rrjetin “X”, Forca Mbrojtëse Izraelite deklaroi:

“Ne duam t’jua bëjmë të qartë se dora e shtetit të Izraelit do të vazhdojë të godasë çdo pasardhës dhe çdo person që përpiqet ta caktojë atë”.

Shteti hebre paralajmëroi edhe pjesëtarët e Asamblesë së Ekspertëve. “Nuk do të hezitojmë t’ju godasim as juve. Ky është një paralajmërim!”, thuhet në profilin e Forcës Mbrojtëse.

Ajatollah Ali Khamenei, që udhëhoqi Iranin për dekada me radhë, mbeti i vrarë në sulmet ajrore amerikano-izraelite më 28 shkurt, ditë që shënoi dhe fillimin e luftës ndaj Iranit, që këtë të diel ndodhet në ditën e nëntë.