Izraeli po shqyrton një ndërhyrje më të thellë në Libanin jugor

Izraeli po shqyrton një ndërhyrje më të thellë në Libanin jugor dhe një zgjerim të pranisë së tij ushtarake atje. Kështu deklaruan dy burime izraelite për CNN, një përpjekje për të parandaluar sulmet e Hezbollahut kundër forcave dhe komuniteteve izraelite.

Kryeministri izraelit, Benjamin Netanyahu thirri një takim me zyrtarët më të lartë të sigurisë të hënën në mbrëmje për të diskutuar zhvillimet në Liban mes sulmeve ushtarake izraelite ndaj objektivave të Hezbollahut dhe sulmeve të përsëritura me raketa ndaj Izraelit, tha një nga burimet.

“Rekomandimi i ushtrisë izraelite përpara diskutimit ishte zgjerimi i zonës tampon të sigurisë përgjatë kufirit,” shtoi burimi.

Diskutimi rreth thellimit të pranisë së Forcave Mbrojtëse të Izraelit, IDF në Libanin jugor vjen pasi disa ushtarë izraelitë u plagosën nga zjarri i raketave antitank. Shtyrja e Hezbollahut më tej do të ndihmonte në uljen e kërcënimit të këtyre raketave, të cilat kanë një rreze veprimi deri në 8 kilometra.

“Kemi një problem me këto raketa dhe nuk mund të merresh me këtë vetëm duke qenë një milje ose një milje e gjysmë brenda Libanit”, tha një nga burimet izraelite.

Izraeli ka mbajtur pesë pozicione në Libanin jugor që nga marrëveshja e armëpushimit e nëntorit 2024. Javën e kaluar, IDF njoftoi se kishte pushtuar disa pozicione të tjera, duke zgjeruar praninë e saj në përgjigje të lëshimit të predhave të Hezbollahut më 2 mars.

Të hënën, Ministri i Jashtëm izraelit Gideon Sa’ar u takua me të dërguarën e Kombeve të Bashkuara në Liban, Jeanine Hennis-Plasschaert. Sipas një njoftimi nga takimi, Sa’ar tha se Hezbollahu kishte lëshuar më shumë predha drejt Izraelit sesa Iranit javën e fundit dhe theksoi se vendosja e IDF-së në Liban është për të mbrojtur qytetarët izraelitë.

IDF ishte zotuar se nuk do të detyrohej të evakuonte komunitetet përgjatë kufirit verior të Izraelit, një vendim që e mori mes zjarrit të përsëritur të Hezbollahut më shumë se dy vjet më parë.