Witkoff: Mbështetja e Britanisë për SHBA-në erdhi vonë, Starmer mund ta rregullojë marrëdhënien me Trumpin

Mbështetja e Britanisë për veprimet ushtarake të SHBA-së kundër Iranit erdhi “pak vonë”, por marrëdhënia e Keir Starmer me Donald Trump mund të rregullohet, sipas Steve Witkoff.

Komentet e Witkoff, vijnë pas një sërë kritikash publike nga udhëheqësi i SHBA-së kundër kryeministrit dhe qëndrimit të Mbretërisë së Bashkuar ndaj sulmeve amerikane dhe izraelite ndaj Iranit.

Starmer kërkoi të rregullonte marrëdhëniet e përçara të dielën në një telefonatë me Trump, pasi ky i fundit kishte deklaruar në mediat sociale: “Nuk kemi nevojë për njerëz që bashkohen në luftëra pasi ne kemi fituar tashmë”.

Ky koment erdhi disa ditë pasi Trump ishte ankuar se Starmer “zgjati shumë” për të lejuar forcat amerikane të përdorin bazat ajrore të Mbretërisë së Bashkuar, dhe më vonë komentoi ashpër për Starmer para gazetarëve: “Ky nuk është Winston Churchill me të cilin kemi të bëjmë”.

“Ai ka thënë, siç e dini, se është pak,  bie në kategorinë e shumë pak, shumë vonë, por mendoj se ata kanë një marrëdhënie të mirë dhe të fortë, dhe shpresoj se do të jenë në gjendje ta riparojnë atë. Unë mbështetem në atë që thotë Presidenti, dhe Presidenti thotë vazhdimisht se të gjithë kanë të drejtë në pikëpamjen e tyre. Por mendoj se ndonjëherë vërejmë se nuk ka atë ndjenjë mirënjohjeje. Mendoj se qëndrimi i Presidentit është që ne të bëjmë shumë për Evropën, shumë për Mbretërinë e Bashkuar, në fushën e tregtisë, në fushën e mbrojtjes, në fushën e mbështetjes që i japim NATO-s. Dhe mendoj se ndonjëherë përgjigjja, reciprociteti, mungon pak. Do ta lija me kaq, në rregull?”, tha ai.