Zaev në Samitin e NATO-s, takime të rëndësishme me Stoltenberg dhe presidentin e Bullgarisë

Kryeministri i Maqedonisë së Veriut, Zoran Zaev, i shoqëruar nga ministrja e Mbrojtjes, dhe ministri i Punëve të Jashtme, Bujar Osmani, udhëhoqi delegacionin qeveritar në Samitin e NATO-s në Bruksel, ku Shkupi mori pjesë për herë të parë si anëtar me të drejta të plota.

Zaev pati një takim me kreun e NATO-s, Stoltenberg dhe me presidentin e Bullgarisë Radev. Kujtojmë se Bullgaria është shteti i cili ka vendosur veton për Maqedoninë e Veriut për nisjen e negociatave për anëtarësim me Bashkimin Evropian.

“Ne jemi të përkushtuar ndaj vizionit të Ballkanit në shekullin 21, si një rajon i paqes, stabilitetit dhe bashkëpunimit të rritur rajonal për përfitime ekonomike dhe prosperitet për të gjithë qytetarët.

Ne fuqimisht besojmë se është e nevojshme që të gjitha vendet e Ballkanit Perëndimor të kenë një perspektivë kristal të qartë euro-atlantike dhe të BE-së. Lënia e një vakumi në pjesën tonë të Evropës nuk është një opsion.

Ne kemi nevojë për procese të parashikueshme, të besueshme dhe të intensifikuara të integrimit në BE dhe NATO”, u shpreh Zaev gjatë këtij samiti.