Ramush Haradinaj: Kurti po e fut dialogun me Serbinë në shtigje të rrezikshme për vendin

Ish-kryeministri i Kosovës, Ramush Haradinaj e cilëson “dështim të plotë” takimin që kryeministri Albin Kurti ka mbajtur sot në Bruksel me Presidentin e Serbisë, Aleksandër Vuçiç.

Sipas kryetarit të Aleancës për Ardhmërinë e Kosovës, z. Kurti nuk ka prioritet njohjen e Kosovës duke iu referuar katë propozimeve që kreu i qeverisë së Kosovës ka bërë në tryezën e bisedimeve.

“Është e habitshme, pse njohja e Kosovës nuk është prioritet i tij. Prioritet i parë i tij na qenka shndërrimi i CEFTA-s në SEFTA. Qesharake. Ashtu si edhe prioriteti i dytë, marrëveshja për paqe mes dy vendeve, e po ashtu edhe qasja për të pagjeturit”, shprehet z. Haradinaj.

Për të “njohja reciproke është i vetmi rezultat që i duhet Kosovës nga ky dialog” dhe se “kjo qasje për të biseduar për tema, pa e njohur shtetet njëra-tjetrën, siç kishte ndodhur më parë në procesin e dialogut, nuk ka rezultate, e në këtë fazë është edhe e rrezikshme për vendin”.