Ministri izraelit, Gideon Sarr: Populli iranian nuk mund të çlirohet pa ndihmë të jashtme

Ministri i Jashtëm i Izraelit, Gideon Sarr ka deklaruar se IDF vrau mbrëmë komandantin e Gardës Revolucionare të Iranit, Gholamreza Soleimani dhe shefin e sigurisë Ali Larijani duke shtuar se iranianët janë më të sigurt pa ta. 

Ai gjithashtu foli lidhur me udhëheqësin e ri suprem të Iranit, Mojtaba Khamenei, i cili nuk është shfaqur në publik që nga emërimi i tij. 

“Ai duhet ta tregojë fytyrën. Mund të vazhdojë të fshihet, por duhet ta tregojë, sepse po fillon të bëhet e sikletshme”, tha ai.

Sipas tij veprimet izraelite po e dobësojnë mekanizmin e shtypjes së Iranit. Ai theksoi se regjimi mund të rrëzohet vetëm nga populli iranian. Ministri shtoi se pa ndihmë të jashtme, populli iranian nuk mund të çlirohet vetë.

Komentet e tij vijnë pasi presidenti amerikan, Donald Trump u ka bërë thirrje vazhdimisht qytetarëve të Iranit që të marrin përsëri kontrollin e vendit të tyre.

“Kur të mbarojmë, merrni qeverinë tuaj, do të jetë e juaja për ta marrë”, tha Trump në fillim të luftës më 28 shkurt.