Shpërndante lëndë narkotike, në pranga 36-vjeçari në Lushnje

Një 36-vjeçar ka rënë në pranga nga policia pasi shpërndante lëndë narkotike në qytetin e Lushnjes.

Në kuadër të operacionit të koduar “Fokusi”, në pranga ka rënë shtetasi O. H., 36 vjeç, të cilit iu gjetën 55 gramë kokainë dhe 562 gramë kanabis, të cilat u sekuestruan në cilësinë e provës materiale.

“Vijojnë operacionet policore për goditjen e shpërndarjes së lëndëve narkotike. Drejtoria Vendore e Policisë Fier ka finalizuar operacionin “Fokusi”, duke vënë në pranga një 36-vjeçar në Lushnjë.

Operacioni u zhvillua nga Sektori për Hetimin e Narkotikëve në bashkëpunim me Prokurorinë, pas një hetimi njëmujor mbi aktivitetin e shpërndarjes së drogës në qytet.

Në kuadër të këtij operacioni u arrestua në flagrancë shtetasi O. H., 36 vjeç, banues në Lushnjë, i dyshuar për shpërndarje të kokainës dhe kanabisit.

Gjatë kontrollit, shërbimet e Policisë sekuestruan rreth 55 gramë kokainë dhe 562 gramë kanabis. Po ashtu, në cilësinë e provës materiale u gjetën dhe një peshore elektronike, një shumë parash e dyshuar si e përfituar nga aktiviteti kriminal, si dhe një telefon celular”, thuhet në njoftimin e policisë.

Materialet procedurale i janë referuar Prokurorisë së Fier, ndërsa ndaj 36-vjeçarit rëndon akuza për veprën penale “Prodhimi dhe shitja e narkotikëve”.