U akuzua si spiun i Mossadit, reagon Suedia: Një qytetar i joni u ekzekutua në Iran

Një qytetar suedez, i cili ndodhej në burg në Iran, është ekzekutuar në orët e para të ditës së sotme. Lajmin e bëri të ditur ministrja e Punëve të Jashtme të Stokholmit, Maria Malmer Stenergard, përmes një deklarate të shpërndarë nga mediat suedeze.

“Me trishtim të thellë mora vesh për ekzekutimin e një qytetari suedez në Iran. Mendimet e mia shkojnë tek familjarët në Suedi dhe në Iran në këtë moment të vështirë”, tha ajo, duke e cilësuar dënimin me vdekje si një ndëshkim “jo njerëzor, i egër dhe i pakthyeshëm”.

Autoritetet e Teheranit kishin njoftuar më parë për ekzekutimin e një burri të dënuar me vdekje për spiunazh në favor të Mossad, pa specifikuar nacionalitetin e tij.