BE hoqi kufizimet e udhëtimet për Shqipërinë, reagon kryeministri Rama

Kryeministri Edi Rama reagoi pas vendimit të Bashkimit Europian për të hequr kufizimet për udhëtarët që vijnë nga Shqipëria duke e cilësuar vendin tonë si zonë të sigurt nga rreziku i COVID-19.

Përmes një postimi në Facebook, kreu i qeverisë e cilëson vendimin një sfidë të kaluar nga Shqipëria, ndërsa shpreh vendosmërinë për ecjen përpara drejt integrimit të plotë të BE.

“Bashkimi Europian ka hequr kufizimet e udhëtimit për udhëtarët nga tetë vende dhe territore jashtë BE, duke përfshirë edhe Shqipërinë.

Ia dolëm edhe kësaj sfide, sepse ne, Shqipëria, nuk ndalemi më në ngjitjen tonë drejt majës ku e meritojnë fëmijët tanë”, shkruan kryeministri në Facebook.

Qeveritë e Bashkimit Evropian vendosën ditën e sotme të heqin kufizimet e udhëtimeve për Shqipërinë, Maqedoninë e Veriut dhe Serbinë, megjithatë disa shtete anëtare të unionit mund të kërkojnë një test negativ të COVID-19 ose karantinë disa ditorë për të lejuar hyrjen në vend.

Shqipëria, Libani, Maqedonia e Veriut, Serbia dhe Tajvani do të shtohen në listën e vendeve të sigurta për të udhëtuar, ndërsa rajonet administrative kineze Hong Kong dhe Makau do të përfshihen vetëm në rast të reciprocitetit.