Emërim i ri në Iran, ish-komandanti i IRGC merr drejtimin e sigurisë kombëtare

Irani ka emëruar një veteran të Gardës Revolucionare Islamike (IRGC) për të drejtuar sigurinë kombëtare.

Mohammad Bagher Zolghadr, një figurë me përvojë të gjatë në strukturat e regjimit, u emërua kreu i ri i Këshillit Suprem të Sigurisë Kombëtare, duke zëvendësuar Ali Larixhanin, i cili u vra në një sulm izraelit javën e kaluar, tha në X Mehdi Tabatabaei, zëvendës për komunikim dhe informacion në zyrën e presidentit Pezeshkian.

Zolghadr është një zyrtar i vjetër i regjimit, i cili ka mbajtur poste të larta në ushtri, institucionet civile dhe ato gjyqësore të Iranit. Rritja e tij lidhet me përvojën si komandant i një divizioni në IRGC gjatë luftës Iran-Irak, ku kishte detyrë të ndërtonte marrëdhënie me grupe paraushtarake ndërkufitare, përfshirë fraksione kurde në Irak.

Më vonë, ai u bë zëvendëskomandant i Gardës Revolucionare për disa vite. Kohët e fundit, ai drejtoi Këshillin e Diskrecionit (Expediency Discernment Council), i cili këshillon Liderin Suprem të Iranit dhe ndërmjetëson mes parlamentit dhe Këshillit të Gardianëve.

Përvoja e tij në disa institucione gjatë katër dekadave ka bërë që vëzhguesit të besojnë se ai gëzonte besimin e liderit suprem tashmë të ndjerë, Ali Khamenei.

Përvoja e tij gjatë luftës e ka bërë gjithashtu të punojë ngushtë me grupe paraushtarake brenda Iranit, si Basij dhe Ansar-e Hezbollah, të cilat janë përdorur për të shtypur opozitën dhe disidencën.

Emërimi i një figure të ashpër dhe me përvojë luftarake si Zolghadr sinjalizon synimin e Teheranit për të ruajtur qëndrimin e tij të sigurisë kombëtare pas vdekjes së Larixhanit, në një kohë kur IRGC po rrit kontrollin mbi vendin.