Britania e Madhe mund të dërgojë anije për pastrimin e minave në Ngushticën e Hormuzit

Britania e Madhe po shqyrton mundësinë e dërgimit të një anijeje në Ngushticën e Hormuzit për të përballuar kërcënimin e minave detare nga Irani. Lajmi raportohet nga zyrtarë të Mbrojtjes britanike për gazetën The Times.

Sipas tyre, plani parashikon përdorimin e një njësie ushtarake të Royal Navy ose një anijeje tregtare të kontraktuar për transportin e dronëve të dizajnuar për gjetjen dhe shkatërrimin e këtyre eksplozivëve. Operacioni do të jetë pjesë e një misioni multinacional me përfshirjen e Francës, SHBA-së dhe vendeve të tjera të paqartësuara.

Gazeta nuk sqaron nëse misioni do të nisë pas përfundimit të përleshjeve në Lindjen e Mesme mes SHBA-së, Izraelit dhe Iranit, apo edhe më herët. Ditët e fundit, përmes ashtuquajturës “Deklarata e Londrës”, ku Italia ishte një nga gjashtë vendet e para që iu bashkuan, 22 shtete shprehën gatishmërinë për të garantuar energjinë në Gjirin Persik dhe lundrimin detar në Ngushticën e Hormuzit, por vetëm pas mbylljes së konfliktit.

“Ne kemi kapacitete të avancuara botërisht në gjuetinë autonome të minave, përveç performancës së lartë të shkatërruesve tanë Type 45 dhe zhvillimit të konceptit të marinës hibride, që na jep mundësinë për të mbrojtur ngushticën pa rrezikuar personelin tonë”, tha një zyrtar britanik për The Times, duke lënë të hapur mundësinë që më vonë më shumë anije britanike të bashkohen në operacion në koordinim me flotat e vendeve të tjera.