Sulmet amerikane-izraelite, evakuohen tetë spitale iraniane

Ministria e Shëndetësisë e Iranit tha sot se tetë spitale janë evakuuar pas sulmeve amerikane dhe izraelite në vend.

Ministria tha se 54 qendra emergjence, 46 njësi trajtimi dhe 216 qendra shëndetësore janë dëmtuar deri më tani në konflikt, sipas agjencisë së lajmeve Tasnim. Përveç kësaj, dhjetëra ambulanca kanë pësuar dëme, ndërsa më shumë se 20 punonjës të kujdesit shëndetësor janë vrarë.

Ndërkohë, Jagan Chapagain, sekretar i përgjithshëm i Federatës Ndërkombëtare të Shoqatave të Kryqit të Kuq dhe Gjysmëhënës së Kuqe, tha se ishte “thellësisht i shqetësuar” nga raportet se një ambulancë e Gjysmëhënës së Kuqe iraniane u godit dje ndërsa po përgjigjej për një emergjencë. Ai tha se askush nuk u lëndua në sulm, por automjeti u shkatërrua.

“Që nga përshkallëzimi i armiqësive, disa ambulanca të Gjysmëhënës së Kuqe janë dëmtuar dhe katër vullnetarë kanë humbur jetën duke shpëtuar të tjerë – vetëm në pesë javë konflikti”, postoi Chapagain në X, ndërsa bëri thirrje për mbrojtjen e vendeve humanitare.