Izraeli kërkoi negociata të drejtpërdrejta, kryeministri libanez do të vizitojë Uashingtonin

Kryeministri libanez Nawaf Salam do të udhëtojë për në Uashington DC në ditët në vijim, pasi Izraeli kërkoi negociata të drejtpërdrejta me Libanin. Kështu ka njoftuar një burim qeveritar libanez për CNN të premten.

Kjo vjen në një kohë kur një armëpushim i brishtë dyjavor midis SHBA-së dhe Iranit po respektohet, për momentin, por është nën tension, veçanërisht për shkak të çështjes nëse sulmet në Liban përfshihen apo jo në armëpushim.

Izraeli ka vazhduar sulmet ndaj objektivave të Hezbollahut në Liban pavarësisht armëpushimit, duke përfshirë një valë të madhe sulmesh të mërkurën që vranë të paktën 300 persona, sipas autoriteteve libaneze.