Belgjika dhe Spanja japin 2 miliardë euro ndihmë për Ukrainën

Ministri i Mbrojtjes i Ukrainës, Mykhailo Fedorov, njoftoi se Belgjika dhe Spanja do të ndajnë nga 1 miliard euro secila në ndihmë ushtarake për Kievin gjatë këtij viti.

Ai bëri të ditur se gjatë bisedimeve me homologët Theo Francken dhe Margarita Robles u diskutua forcimi i mbrojtjes ajrore, zgjerimi i kapaciteteve të dronëve dhe furnizimi me artileri me rreze të gjatë veprimi në kuadër të “iniciativës çeke”.

Brukseli konfirmoi gjithashtu se do të dërgojë avionë shtesë F-16 dhe pjesë këmbimi për flotën ekzistuese të Ukrainës.

Ndërkohë, me Spanjën u diskutua zgjerimi i bashkëpunimit në industrinë e mbrojtjes, përfshirë mekanizmin evropian SAFE, ndërsa Ukraina ofroi testimin e dronëve spanjollë në kushte reale lufte.