Libani i paraqet ankesë OKB-së: Sulmet izraelite, një shkelje flagrante e ligjit ndërkombëtar

Libani i ka kërkuar përfaqësuesit të tij të përhershëm në OKB që të paraqesë një ankesë urgjente në lidhje me sulmet ajrore izraelite të kryera më 8 prill që vranë më shumë se 300 njerëz në të gjithë vendin.

Izraeli kreu atë që e quajti sulmin më të madh të koordinuar në Liban që kur filloi të sulmonte vendin në mars.

“Këto sulme shënjestruan zona banimi me popullsi të dendur gjatë orëve të pikut dhe pa paralajmërim paraprak, duke rezultuar në shkatërrime të gjera dhe qindra viktima, shumica e të cilëve ishin civilë të paarmatosur”, tha ministria e jashtme e Libanit.

Të paktën 303 persona vdiqën si pasojë e sulmeve atë ditë, 30 prej të cilëve ishin fëmijë. Ministria e Jashtme libaneze i quajti sulmet një shkelje flagrante të ligjit ndërkombëtar.

Ushtria izraelite tha javën e kaluar se pjesa më e madhe e infrastrukturës që u godit ndodhej brenda zemrës së popullsisë civile, si pjesë e shfrytëzimit të civilëve libanezë nga Hezbollahu si mburoja njerëzore me qëllim mbrojtjen e operacioneve të saj. Ajo nuk dha prova për këtë pretendim.

Sulmet izraelite në Liban kanë vrarë të paktën 2,124 persona që nga 2 marsi, tha dje ministria libaneze e shëndetësisë. Të paktën 168 fëmijë janë midis të vrarëve, tha ajo, si dhe të paktën 88 punonjës shëndetësorë.