Al Shara: Lartësitë e Golanit janë siriane, negociatat me Izraelin në disa faza

Presidenti i Sirisë, Ahmed al-Shara, tha sot se çdo njohje e sovranitetit të Izraelit mbi Lartësitë e Golanit është e paligjshme dhe kërcënon të drejtat e popullit sirian, duke shtuar se negociatat me Izraelin po zhvillohen në disa faza.

“Lartësitë e Golanit janë e drejtë e popullit sirian dhe asnjë vend nuk heq dorë nga një pjesë e territorit të tij”, tha Shara.

Ai deklaroi, siç raportohet nga Times of Israel, se negociatat me Izraelin po zhvillohen në disa faza dhe se në fazën e parë po diskutohet një marrëveshje me anë të së cilës forcat izraelite do të tërhiqeshin në vijat e armëpushimit të vitit 1974, të vendosura pas Luftës së Yom Kippur në vitin 1973.

Sipas tij, propozimi i marrëveshjes bazohet në respektimin e marrëveshjes së vitit 1974, duke ruajtur kontrollin izraelit mbi Lartësitë e Golanit.

“Kjo marrëveshje ishte e vlefshme për 50 vjet, derisa Izraeli e shkeli atë pas rënies së regjimit të (ish-presidentit sirian Bashar al-Assad). Nëse kjo fazë ka sukses, ne do të hyjmë në negociata afatgjata për të zgjidhur çështjen e Lartësive të pushtuara të Golanit “, tha Al Shara.

Lartësitë e Golanit u pushtuan nga Izraeli nga Siria në Luftën Gjashtëditore në vitin 1967 dhe më vonë u aneksuan, me pjesën më të madhe të bashkësisë ndërkombëtare që nuk e njohu atë aneksim, ndërsa SHBA-të e po.

Al-Shara erdhi në pushtet në fund të vitit 2024, pasi koalicioni islamist që ai drejtoi rrëzoi nga pushteti udhëheqësin e hershëm sirian, Bashar al-Assad.

Pas kësaj, Izraeli vendosi forcat e tij në zonat kufitare të Sirisë për të krijuar një zonë tampon.