Irani paraqet propozim të ri për bisedime me SHBA-në

Irani u ka dërguar ndërmjetësve pakistanezë një propozim të ri për rifillimin e negociatave me Shtetet e Bashkuara, sipas mediave iraniane.

“Republika Islamike e Iranit ia dorëzoi tekstin e propozimit të saj të fundit negociues Pakistanit, si ndërmjetës në bisedimet me Shtetet e Bashkuara, të enjten në mbrëmje”, raportoi agjencia zyrtare e lajmeve IRNA, pa dhënë hollësi. 

Detajet e këtij propozimi nuk janë bërë ende publike dhe mbetet e paqartë nëse presidenti amerikan Donald Trump do ta pranojë atë.

Të dy vendet kanë qenë në një situatë bllokimi për rreth katër javë, që prej arritjes së një armëpushimi të përkohshëm. Gjatë kësaj periudhe, SHBA ka bllokuar portet iraniane, ndërsa Ngushtica e Hormuzit vazhdon të mbetet praktikisht e mbyllur nga ana e Teheranit.

Megjithëse publikisht bisedimet janë perceptuar si të ndërprera, Trump deklaroi një ditë më parë se statusi i tyre nuk është i njohur për publikun, duke lënë të kuptohet se negociatat mund të jenë ende në zhvillim.