Ndahet dosja, Meta e Kryemadhi me proces të rregullt. Gjykim i shkurtuar për të akuzuarit e tjerë

Gjykata e Posaçme pranoi kërkesën për gjykim të shkurtuar, për tre të pandehurit e tjerë të dosjes kundër ish-presidentit Ilir Meta: nënën e Monika Kryemadhit, Ema Çokun dhe Pirro Xhixho.

Ndërkohë, Ilir Meta dhe Monika Kryemadhi do gjykohen me gjykim të zakonshëm.

SPAK kundërshtoi sot kërkesën e paraqitur nga avokati i Metës për lirimin e tij, duke argumentuar se vendimi i Kolegjeve të Bashkuara të Gjykatës së Lartë nuk sjell asgjë të re në këtë proces dhe nuk ndryshon rrethanat mbi të cilat është vendosur masa e sigurisë.

Prokuroria e Posaçme theksoi se nuk ekzistojnë kushte të reja që justifikojnë ndryshimin e masës së sigurisë ndaj Metës.

Nga ana tjetër, avokati Kujtim Cakrani kërkoi lirimin e Metës, duke iu referuar edhe një vendimi të fundit të Kolegjit të Bashkuar të Gjykatës së Lartë, i cili lidhet me interpretimin e masave të sigurisë.

Gjatë seancës, Cakrani përmendi edhe rastin e ish-drejtoreshës së AKSHI-t, duke deklaruar se “Gjykata e Lartë e liroi atë, ndërsa Metën e mban prej 19 muajsh në paraburgim”.

Avokati shtoi se mbrojtja është e gatshme të ofrojë edhe garanci pasurore, sipas vlerësimit që mund të caktojë gjykata.