Detaje, i riu në Itali shfaq simptoma pasi udhëtoi në avion me gruan që humbi jetën nga hantavirusi

Një i ri 25-vjeçar nga Kalabria, i cili ndodhej në një fluturim të kompanisë KLM ku ishte edhe një grua nga Afrika e Jugut që më vonë humbi jetën nga hantavirusi, dyshohet se ka shfaqur simptoma të virusit dhe pritet të transferohet në spitalin e sëmundjeve infektive “Spallanzani” në Romë, bëjnë me dije burime për agjencinë italiane ANSA.

Sipas të njëjtave burime, i riu ndodhej tashmë në karantinë dhe do t’i nënshtrohet analizave për të përcaktuar nëse është pozitiv me virusin. Autoritetet shëndetësore po ndjekin nga afër situatën dhe pritet verifikimi përfundimtar laboratorik.

Ndërkohë, deri të martën në mëngjes, sipas Organizatës Botërore të Shëndetësisë (OBSH), janë konfirmuar nëntë raste të lidhura me shpërthimin e raportuar, ndërsa drejtori i përgjithshëm i OBSH-së, Dr. Tedros Adhanom Ghebreyesus, ka theksuar se për shkak të periudhës së gjatë të inkubacionit që mund të zgjasë deri në 42 ditë, nuk përjashtohet mundësia e shfaqjes së rasteve të tjera në javët në vijim.

Ekspertët kanë identifikuar brejtësit e egër si burimin kryesor të hantavirusit, veçanërisht disa specie të përhapura në Amerikën e Jugut, të cilat lidhen me transmetimin e virusit te njerëzit përmes kontaktit me jashtëqitjet e infektuara (urinë, feçe ose pështymë), që mund të shpërndahen në ajër si pluhur i kontaminuar.

Hantaviruset, sipas specialistëve të virologjisë, janë të shpërndarë globalisht dhe ndahen në dy grupe kryesore: ato të Botës së Vjetër (Evropë, Azi dhe Afrikë) dhe ato të Botës së Re (Amerika). Format e para zakonisht shkaktojnë ethe hemorragjike me sindromë renale dhe kanë vdekshmëri më të ulët, ndërsa format amerikane lidhen më shpesh me sindromën kardiopulmonare, e cila në disa raste mund të jetë shumë e rëndë.

Në rastin e shpërthimit të lidhur me MV Hondius, ekspertët dyshojnë se infeksioni mund të jetë marrë gjatë qëndrimit të pasagjerëve në zona rurale të Amerikës së Jugut, përpara hipjes në anije. Lloji i Andeve i hantavirusit përmendet si një nga variantet më të rrezikshme, me një shkallë vdekshmërie që mund të arrijë deri në 60% dhe me raste të dokumentuara të transmetimit nga njeriu te njeriu.

Çdo vit në Argjentinë raportohen rreth njëqind raste të këtij lloji të hantavirusit, kryesisht në rajonet jugore të Patagonisë, ku brejtësit e egër që mbartin virusin janë të përhapur në zona me lagështi dhe bimësi të ulët pranë trupave ujore.