Evropa kërkon “kanal” me Putinin! Draghi, Merkel dhe…emrat surprizë në tryezë

Qeveritë e Bashkimit Europian po shqyrtojnë mundësinë e emërimit të një figure të lartë evropiane për të përfaqësuar bllokun në negociatat e mundshme me presidentin rus Vladimir Putin, në kuadër të përpjekjeve për të rivendosur kanalet zyrtare të komunikimit me Moskën.

Sipas një raporti të Financial Times, mes emrave të diskutuar janë ish-presidenti i Bankës Qendrore Europiane, Mario Draghi, dhe ish-kancelarja gjermane Angela Merkel, si dhe ish-presidentët finlandezë Alexander Stubb dhe Sauli Niinistö.

Çështja pritet të trajtohet nga ministrat e jashtëm të BE-së në një takim në Qipro javën e ardhshme, ndërsa diskutimet në kryeqytetet europiane janë ende në fazë të hershme dhe me ndarje të thella mes vendeve anëtare.

Sipas burimeve të cituara, administrata amerikane e Donald Trump nuk ka kundërshtuar idenë që Evropa të zhvillojë kontakte paralele me Rusinë, përveç negociatave të udhëhequra nga SHBA për përfundimin e luftës në Ukrainë.

Brukseli ka mbajtur të ngrira kanalet zyrtare me Moskën që nga viti 2022, me përjashtime të kufizuara në nivele individuale. Megjithatë, mungesa e përparimit në procesin e paqes ka shtuar shqetësimet se BE po mbetet jashtë negociatave kryesore.

Zyrtarë evropianë theksojnë se ende nuk ka konsensus për krijimin e një emisioni të posaçëm, si për profilin e tij, ashtu edhe për mandatin që do të kishte në një dialog të mundshëm me Kremlinin.

Në këtë debat, Mario Draghi shihet nga disa vende si një zgjedhje teknokratike dhe e besueshme, ndërsa për Angela Merkel ekzistojnë kundërshti politike, veçanërisht në Gjermani, për shkak të trashëgimisë së politikave të saj ndaj Rusisë.