Aksidenti me katër të vdekur në një familje, arrestohet i riu me “Audi”

Policia ka arrestuar I. Medani, 22 vjeç, i cili dyshohet se është bërë shkak për aksidentin e rëndë të ndodhur sot në aksin rrugor Fier-Vlorë, ku mbetën të vdekur katër pjesëtarë të një familjeje.

Specialistët e Qarkullimit Rrugor në Drejtorinë Vendore të Policisë Vlorë arrestuan në flagrancë të riun, banues në Tiranë në ambientet e spitalit ku po merr mjekim për plagët e shkaktuara në aksident.

22-vjeçari duke drejtuar automjetin tip “Audi”, në aksin rrugor Fier-Vlorë, dyshohet se ka humbur kontrollin dhe ka goditur nga mbrapa automjetin tip “Toyota” me drejtues shtetasin E. G., 44 vjeç dhe si pasojë ndërruan jetë 4 shtetasit që udhëtonin me mjetin “Toyota”.

Gjithashtu, si pasojë ka mbetur i dëmtuar vetë drejtuesi i mjetit “Audi” dhe dy pasagjerët, të cilët ndodhen në spital, nën kujdesin e mjekëve. Materialet në ngarkim të tij i kaluan Prokurorisë pranë Gjykatës së Shkallës së Parë Vlorë për veprën penale “Shkelja e rregullave të qarkullimit rrugor”.

Kodi Rrugor, më konkretisht Neni 290 parashikon se në rastet kur “nga vepra penale është shkaktuar vdekja ose plagosja e rëndë e disa personave, dënohet me burgim nga pesë deri në njëzet vjet”.

Në aksidentin e ndodhur mëngjesin e së premtes mbetën të vdekur çifti i bashkëshortëve dhe dy vajzat e tyre që po udhëtonin në makinën tip “Toyota”. Ndërsa tre personat në “Audi” mbetën të plagosur.

LEXONI GJITHASHTU:

Dervishaj: Aksidentet po marrin 4 herë më shumë jetë se ngjarjet kriminale

Aksident i rëndë në aksin Fier-Vlorë, humbin jetën 4 persona të së njëjtës familje

Aksidentet në rritje, 70 viktima në 4 muajt e parë të vitit