Përplasja për vdekje e 7-vjeçarit në Elbasan, banorët: Ecin shumë shpejt, shoferët nuk zbatojnë sinjalistikën

Prindër e gjyshër të frikësuar, të pikëlluar dhe të trishtuar. Kjo ishte panorama që la pas aksidenti tragjik i një dite më parë në fshatin Mengël në qytetin e Elbasanit, ku humbi jetë 7-vjeçari.

Teksa shoqëronin fëmijët për në shkollë mëngjesin e sotëm, për kamerën e Euronews Albania pas aksidentit të rëndë banorët shprehen se ndihen të frikësuar për jetët e tyre dhe të fëmijëve, të cilët kërkojnë marrjen e masave në mënyrë të menjëhershme, e cila sipas tyre është një ngjarje e përsëritur dhe një kambanë alarmi.

“Shumë të shqetësuar jemi, kjo është rruga e vdekjes. Këtu duhet të ketë edhe njerëzillëk të zbatojnë sinjalistikën. Ata nuk zbatojnë asnjë lloj sinjalistike. Është zonë e banuar, duhet zbatuar sinjalistika. Është jo kambanë, por të vësh duart në kokë, është ekstrem”, u shpreh një banor i zonës teksa çonte fëmijën për në shkollë.

Ndërsa të tjerë shprehin shqetësimin se fëmijët dhe vetë ata ndodhen të rrezikuar nga makinat që kalojnë në këtë rrugë, ku, siç e theksuan edhe ata, në të njëjtin aks rrugor kanë humbur jetën fëmijë dhe persona të tjerë.

“Shumë të tronditur, kjo punë është çdo ditë këtu. Ecin shumë shpejt, jo vetëm fëmijët, por edhe ne në rrezik jemi këtu. Nuk kemi gjë në dorë, e ka shteti. Do të ngrihemi nëse është nevoja. Ai u nis për shkollë dhe do të varroset sot. Humbja është për të gjithë ne, ka që i respektojmë rregullat, ka që s’i respektojnë. Është tragjedi e madhe”, u shpreh më tej një burrë.