35-42 raste në javë, mjekët: Virozat po prekin më shumë fëmijët dhe të moshuarit

Ndryshimet e menjëhershme të temperaturave kanë sjellë rritje të rasteve me viroza respiratore në Elbasan. Mjekët e qendrave shëndetësore raportojnë se çdo ditë paraqiten 5 deri në 6 pacientë me simptoma si kollë, temperaturë, dhimbje trupi dhe lodhje të theksuar. Më të rrezikuar mbeten fëmijët, të moshuarit, gratë shtatzëna dhe personat me sëmundje kronike.

“Aktualisht po qarkullon një virus respirator sezonal që po prek një pjesë të madhe të popullsisë. Pacientët paraqiten me kollë, dhimbje trupi, pafuqi dhe temperaturë. Kjo virozë favorizohet nga ndryshimet e temperaturave dhe qëndrimi në ambiente të mbyllura. Grupet më të rrezikuara janë fëmijët, gratë shtatzëna, të moshuarit dhe personat me sëmundje kronike. Këshillohet shmangia e ambienteve të mbyllura, hidratimi dhe paraqitja te mjeku i familjes në shfaqjen e simptomave të para”, tha Evis Gjorga, Mjeke e Përgjithshme.

Në këtë periudhë pranverore, mjekët theksojnë edhe rëndësinë e dallimit mes virozave dhe alergjive sezonale, pasi simptomat shpesh ngatërrohen nga qytetarët.

“Duke qenë se jemi në stinën e pranverës, është e rëndësishme të bëhet dallimi mes alergjive sezonale dhe virozave respiratore. Pacientët duhet të paraqiten te mjeku i familjes për një diferencim të saktë. Virozat shoqërohen zakonisht me temperaturë, dhimbje koke dhe dhimbje trupi, ndërsa alergjitë me teshtima, lotim sysh dhe djegie hundësh, por pa temperature”, shtoi ajo.

Sipas mjekëve, vetëm në një qendër shëndetësore në Elbasan regjistrohen rreth 35 deri në 42 raste në javë, duke reflektuar një rritje të qarkullimit të virozave në këtë periudhë sezoni.