Shpërthim në zonën e Metalurgjikut në Elbasan, nuk raportohet për të lënduar

Elbasani është tronditur mbrëmjen e së hënës nga një shpërthim në zonën e Kombinatit Metalurgjik.

Raportimet e para flasin për një shpërthim të fortë që është dëgjuar disa kilometra larg.

Shpërthimi dyshohet të ketë ndodhur në mjediset e një prej kompanive që përpunojnë metale, ndërkohë që nuk ka pasur raportime për të lënduar.

Një vit më parë në zonën industriale pati një shpërthim të ngjashëm, i cili u shkaktua nga rrjedhja e gazit.

Prej këtij shpërthimi asokohe u lënduan tre punonjës, ndërsa autoritetet arrestuan si përgjegjës administratorin e kompanisë.

Kompleksi industrial i përpunimit të metaleve, njohur si “Kombinati Metalurgjik” u ngrit në Elbasan gjatë mesit të viteve 60-të në fushën e Bradasheshit, rreth 4 kilometra në perëndim të qytetit.

Me një projekt të mbështetur kryesisht nga Kina, Metalurgjiku pati si fillim uzinën e petëzimit, më pas u shtuan uzina e gizës, çelikut, karbonit, nikel-kobaltit, furrënaltat mbështetëse dhe një linjë e dedikuar hekurudhe e gjitha në një sipërfaqe rreth 160 hektarë.

Në këtë kompleks deri në fund të viteve 80-të punuan mbi 10 mijë punonjës, mirëpo që në vitet e para pati një bilanc në humbje pasi kostot ishin tejet të mëdha. Pas rrëzimit të diktaturës uzinat u detyruan të mbyllen.

Ditët e sotme një pjesë e metalurgjikut nuk punon më. Në funksion janë vetëm disa reparte të përpunimit të çelikut teksa mjediset në përgjithësi u janë dhënë në përdorim kompanive private.

LEXONI GJITHASHTU:

• Shpërthimi i gazit lëndon 3 punonjës në zonën e ish-metalurgjikut të Elbasanit
• Elbasan, policia arreston administratorin e biznesit të gazit ku u lënduan 3 punonjës