Nata e dytë e trazirave në Irlandën e Veriut, policia përdor autobotë me ujë për të shpërndarë protestuesit

Një autobotë me ujë u vendos për të shpërndarë një turmë të madhe gjatë natës së dytë radhazi të trazirave në Irlandën e Veriut, të cilat shpërthyen pas sulmit me thikë në Belfast.

Një grup njerëzish po hidhnin tulla, shishe dhe objekte prej druri. Autoritetet pezulluan transportin publik, ndërsa disa shkolla u mbyllën herët për të shmangur problemet nga trazirat.

Qendra e Belfastit paraqiti një pamje shkretie, pasi shumë biznese mbyllën qepenat e tyre që në mesditë, nga frika e incidenteve të reja.

Videot që janë publikuar tregojnë dhjetëra njerëz të veshur me të zeza dhe me fytyrat e mbuluara duke shembur gardhet e banesave.

Një automjet i madh në pronësi të Ministrisë së Infrastrukturës u përfshi nga flakët, ndërsa kazanët e mbeturinave u vunë në flakë gjatë incidenteve.

Turma u përpoq t’i vinte flakën një prone të braktisur, ndërsa disa hodhën kokteje Molotov drejt forcave të policisë.

Demonstrata u zhvilluan edhe në zona të tjera të Irlandës së Veriut, të cilat ishin kryesisht paqësore.

Në lindje të Belfastit, ku dje, të martën, kishin ndodhur incidente të rënda, rreth 150 persona u mblodhën nën një prani të madhe policore. Policia raportoi se pati pak incidente dhe u bënë pak arrestime.

Më herët, 30-vjeçari Hadi Alodid , me origjinë nga Sudani, u paraqit në gjykatë të mërkurën dhe u akuzua për tentativë vrasjeje në lidhje me një sulm me thikë që ndodhi të hënën në veri të Belfastit dhe i shkaktoi lëndime të rënda viktimës, Stephen Ogilvy.

Ogilvy, rreth moshës 40 vjeç, ka humbur syrin e majtë, pësoi dëmtime serioze në syrin e djathtë, si dhe lëndime në qafë dhe shpinë.

Familja e tij lëshoi ​​një deklaratë të re të mërkurën në mbrëmje, duke thënë se gjendja e tij ishte e qëndrueshme. Ata thanë se u detyruan ta bënin deklaratën për shkak të “sasisë së madhe të informacionit të rremë në mediat sociale”.

Në të njëjtën kohë, ata bënë thirrje për “protestë paqësore si e vetmja rrugë përpara” , duke nënvizuar se “shumë emigrantë japin kontribute të konsiderueshme dhe të vlefshme në shoqërinë tonë” .

Reagimi ndaj incidentit, si dhe origjina e supozuar etnike e autorit të krimit, çuan në protesta të martën në mbrëmje në shumë zona të Irlandës së Veriut.

Grupe burrash me kapuçë u vunë flakën shtëpive, një autobusi dhe automjeteve, kryesisht në Belfast, duke i detyruar familjet të largoheshin nga shtëpitë e tyre. Kokteje Molotov u hodhën gjithashtu ndaj forcave të policisë në vende të ndryshme.