Konflikt për shfrytëzimin e plazhit në Ksamil, biznesmeni pretendon se i është hequr padrejtësisht leja

Konfliktet për menaxhimin e vijës bregdetare duket janë shtrirë nga veriu në jug. Pas ngjarjeve të shënuara në Velipojë dhe Dhërmi, një konflikt është regjistruar në Ksamil ditën e djeshme.

Pronari i një hoteli, Albert Sula, njëherësh dhe anëtar i Këshillit Bashkiak të Sarandës është përplasur me punonjësit e policisë, të cilët kanë shkuar për të hequr çadrat dhe shezlongët në pronësi të tij dhe kanë vendosur ato të dikujt tjetër.

Sipas biznesmenit, ai e shfrytëzon prej 15 vitesh hapësirën e përcaktuar nga institucionet, ndërsa tashmë Sula thotë se sipërfaqja i ka kaluar një punonjësi policie në mënyrë të padrejtë.

Sula pohon se e ka marrë kontratën te Ministria e Turizmit por bashkia nuk pranon pagesën e kontratës sepse ka marrë pagesën nga pala tjetër.

Korrespondenti i Euronews Albania, Viktor Avdiaj intervistoi Anila Sulën, e cila ka menaxhuar plazhin për 15 vjet, dhe theksoi se subjekti që ka marrë kontratën nuk përmbush asnjë nga kriteret për menaxhimin e sipërfaqes siç janë; kulla e vrojtimit, tualetet apo dhomat e ndërrimit, andaj gjithë situata e krijuar është e padrejtë.

“Miratimin e Ministrisë së Turizmit e kemi, por pa bërë pagesa si mund të merret kontrata? Këtu është i gjithë ai korrupsioni që është bërë sepse pagesa ime nuk pranohet nga bashkia. Dua të më thonë arsyen, përse kur unë e paguaj duhet ta marri dikush tjetër? Unë i jam përgjigjur shtetit në çdo lloj mënyre që ma ka kërkuar”, tha Anila Sula.

Euronews Albania u interesua për të mësuar qëndrimin e palës tjetër, por ata nuk pranuan që të prononcoheshin.

Albert Sula thotë se është ankuar pranë Agjencisë Kombëtare të Bregdetit, por as nga aty nuk ka pasur një reagim.

LEXONI GJITHASHTU: 

• 4 të vrarë e 2 të plagosur pas një përplasje me armë në Velipojë
• Dëshmitari i ngjarjes së Velipojës tregon detajet nga momenti para përplasjes ku humbën jetën 4 persona
• Digjen 60 shezlongë në Dhërmi, dyshohet se shkak është konkurrenca