“Na detyruan të largohemi menjëherë pas ndeshjes, po na dëmtojnë fizikisht”, trajneri i Iranit kritika për organizimin e Botërorit

Trajneri i kombëtares së Iranit, Amir Ghalenoei, ka shprehur pakënaqësi të fortë ndaj organizimit të Botërorit, duke deklaruar se skuadra e tij u urdhërua të largohej nga Shtetet e Bashkuara vetëm pak orë pas ndeshjes së parë kundër Zelandës së Re, e cila përfundoi në barazim 2-2.

Sipas Ghalenoeit, ekipi kishte planifikuar të kalonte natën në Kaliforni për të ndjekur procedurat normale të rikuperimit fizik pas ndeshjes. Megjithatë, menjëherë pas përfundimit të takimit, futbollistët dhe stafi teknik u informuan se duhej të hipnin menjëherë në avion për t’u kthyer në bazën e tyre stërvitore në Tijuana, Meksikë.

“Madje nuk na dhanë as kohë për t’u rikuperuar. Pas ndeshjes së sotme na thanë: ‘Duhet të largoheni menjëherë’. Për ne është shumë e rëndësishme të kemi kohë për rikuperim, por na kërkohet të udhëtojmë menjëherë drejt Tijuana-s dhe kjo na shqetëson shumë”, tha trajneri iranian përmes një përkthyesi.

Edhe kapiteni i Iranit, Mehdi Taremi, kritikoi situatën, duke kërkuar më shumë mbështetje nga FIFA.

“Duhet të largohemi nga Los Anxhelesi menjëherë dhe kjo nuk është aspak e mirë për ne. Mendoj se FIFA duhet të na ndihmojë më shumë. Në fakt, për ne kjo situatë është një katastrofë”, deklaroi Taremi.

Kombëtarja iraniane është vendosur në Tijuana gjatë turneut, ndërsa udhëtimet e shpeshta dhe mungesa e kohës për rikuperim mund të ndikojnë në përgatitjen e ekipit për ndeshjet e ardhshme të Botërorit.