E rëndë në Angli, fëmija 3-vjeçar plagoset pasi përfundoi në kafazin e krokodilëve! Arrestohet një 30-vjeçar

Policia në Mbretërinë e Bashkuar tha të enjten se një burrë ishte arrestuar me dyshimin për tentativë vrasjeje pasi një djalë trevjeçar “përfundoi në kafazin e krokodilëve” në një kopsht zoologjik, shkruan BBC.

Policia e Cambridgeshire tha se fëmija kishte pësuar “lëndime serioze” dhe ishte në një gjendje “kritike, por të qëndrueshme” në Spitalin Addenbrooke në Kembrixh.

Nuk specifikoi se si ishin shkaktuar lëndimet dhe nëse ato ishin shkaktuar nga një krokodil.

“Një burrë 30-vjeçar nga Norfolku është arrestuar me dyshimin për tentativë vrasjeje”, shtoi policia, duke vënë në dukje se oficerë të trajnuar posaçërisht po mbështesnin familjen e djalit në spital.

Policia shtoi se oficerët u thirrën në kopshtin zoologjik të enjten në drekë pas “raporteve për një incident që përfshinte një djalë trevjeçar, gjatë të cilit ai përfundoi në kafazin e krokodilëve”.

“Në këtë fazë po flasim me njerëz që ishin në kopshtin zoologjik në kohën e këtij incidenti shqetësues për të kuptuar më shumë rreth rrethanave”, tha inspektorja detektive Verity McCann në deklaratën e policisë.

“Ne nuk besojmë se burri i arrestuar dhe fëmija njihen me njëri-tjetrin”, shtoi ajo.

Johnsons of Old Hurst është një biznes bujqësor familjar që tani përmban një kasap, një dyqan ferme, një dhomë çaji, një restorant biftekësh, si dhe një kopsht zoologjik, sipas faqes së saj të internetit .

Thuhet se është shtëpia e më shumë se 100 kafshëve, duke përfshirë luanë, tigra, arinj, kapibara, meerkat dhe krokodilë.