Trump reagon për Andy Burnham: Kam dëgjuar se është jashtëzakonisht liberal

Presidenti amerikan, Donald Trump e ka quajtur Andy Burnham “jashtëzakonisht liberal”, në komentet e tij të para publike për ish-kryetarin e bashkisë së Mançesterit të Madh që kur ai doli si favorit për të zëvendësuar Keir Starmer.

Presidenti amerikan u tha gazetarëve se Burnham ndoshta nuk do ta hapë Detin e Veriut për eksplorimin e naftës dhe se Mbretëria e Bashkuar po vdes, duke sinjalizuar se ai mund të përballet me një marrëdhënie të tensionuar me Trumpin.

Burnham ka qenë kritik ndaj Trump në të kaluarën, duke e përshkruar politikën amerikane si “të polarizuar” dhe “helmuese” gjatë fushatës zgjedhore në Makerfield këtë muaj.

Ndërsa protestuesit sulmuan Kapitolin e SHBA-së në vitin 2021, Burnham postoi në X: “Çdo politikan britanik që i dha kohë Trumpit duhet të turpërohet tani.”

I pyetur të mërkurën se çfarë dinte për Burnham, Trump tha: “Nuk e di, mendoj se shoh që ai ishte, mendoj, kryetari i bashkisë së një qyteti.”

“Kam dëgjuar se është jashtëzakonisht liberal, jashtëzakonisht, që do të thotë se ndoshta nuk do ta hapë Detin e Veriut.”

Komentet e Trumpit për Burnhamin erdhën gjatë një takimi me sekretarin e përgjithshëm të NATO-s, Mark Rutte. Rutte po viziton Uashingtonin në përpjekje për të zbutur tensionet në aleancë për shkak të luftës me Iranin dhe kërcënimeve të Trump për të tërhequr trupat nga Evropa, përpara një samiti të rëndësishëm të liderëve të NATO-s në korrik në Ankara.