Austria në alarm të kuq nga vala e të nxehtit

Austria ka shpallur nivelin më të lartë të alarmit për nxehtësinë në pjesë të mëdha të vendit, pasi temperaturat pritet të arrijnë deri në 40 gradë Celsius gjatë fundjavës. Autoritetet kanë paralajmëruar gjithashtu për një rrezik të shtuar të zjarreve në rajonet lindore.

Shërbimi kombëtar meteorologjik, GeoSphere Austria, lëshoi alarm të kuq për periudhën nga e shtuna deri të hënën në verilindje të vendit, duke përfshirë Vjenën, pjesë të Austrisë së Poshtme dhe Burgenlandin, duke bërë të ditur se vala e të nxehtit po i afrohet kulmit.

Sipas agjencisë, rekordi kombëtar i temperaturës prej 40.5 gradë Celsius, i vendosur në Bad Deutsch-Altenburg në vitin 2013, mund të thyhet të dielën.

Paralajmërime të kuqe janë lëshuar edhe për pjesë të Austrisë së Epërme, ndërsa qytetet Graz, Klagenfurt dhe Villach pritet të arrijnë nivelin më të lartë të alarmit gjatë së dielës.

GeoSphere Austria theksoi se një nga arsyet kryesore për shpalljen e alarmit është mungesa e ftohjes gjatë natës, pasi temperaturat minimale pritet të mbeten mes 24 dhe 27 gradë Celsius në shumë zona urbane.

“Rajoni i Alpeve Lindore është nën ndikimin e një sistemi të fuqishëm me presion të lartë dhe masat ajrore subtropikale po dominojnë motin”, tha drejtori i përgjithshëm shkencor i GeoSphere Austria, Andreas Schaffhauser.

Ai shtoi se për shkak të stresit të vazhdueshëm nga nxehtësia dhe rritjes së mëtejshme të temperaturave, alarmi i kuq do të hyjë në fuqi nga dita e shtunë.

Agjencia u bëri thirrje qytetarëve të shmangin ekspozimin në diell, të qëndrojnë në ambiente të mbyllura gjatë orëve më të nxehta, të veshin rroba të lehta, të konsumojnë dy deri në tre litra lëngje në ditë dhe të shmangin alkoolin.

Ndërkohë, autoritetet kanë paralajmëruar edhe për rrezik në rritje të zjarreve në Austrinë e Poshtme lindore.