Lionel Messit i mbaron kontrata me Barcelonën

Argjentinasi Lionel Messi nuk ka firmosur ende një kontratë të re me Barcelonën, klubin ku ai ka shpenzuar të gjithë karrierën e tij futbollistike, teksa nga data 1 korrik, atij i përfundoi kontrata me klubin katalanas.

Golashënuesi më i mirë i Barcelonës, i cili iu bashkua klubit spanjoll në moshën 13-vjeçare në vitin 2000, mund të konsiderohet si lojtar i lirë, deri sa të vendosë nëse do të firmosë një kontratë të re.

Të pyetur të martën mbi të ardhmen e Messit, drejtuesit e Barcelonës nuk dhanë koment edhe pse dështimi i një marrëveshjeje përpara datës 30 qershor shqetëson tifozët katalanas.

Presidenti i Barcelonës, Joan La Porta u shpreh besimplotë për të ardhmen e sulmuesit argjentinas, në kohën kur Barcelona po përballet me një situatë të vështirë financiare, ku borxhi total i klubit arrin në 1 miliard euro.

Messi, i cili festoi 34-vjetorin gjatë javës që shkoi, u shndërrua në golashënuesin më të mirë të kombëtares së Argjentinës, teksa shënoi dy herë në fitoren 4-1 ndaj Bolivisë.