E dyshuara për atentatin ndaj biznesmenit ukrainas në Monako gjendet e vdekur pranë Kievit

Anastasia Berezovskaya, e dyshuara kryesore për tentativën e vrasjes së biznesmenit ukrainas Vadim Yermolaev në Monako dhe e kërkuar nga Interpoli, është gjetur e vdekur pranë Kievit.

Sipas mediave ukrainase, duke cituar burime policore, trupi i 39-vjeçares është gjetur i varrosur të hënën rreth orës 23:00 në zonën pranë kryeqytetit ukrainas. Nga informacionet paraprake dyshohet se ajo është qëlluar për vdekje.

Burimet policore kanë bërë të ditur se Berezovskaya kishte qenë jashtë Ukrainës nga 22 marsi 2025 deri më 1 korrik 2026. Ndërkohë, dy persona të tjerë dyshohet se janë arrestuar në lidhje me këtë ngjarje. Njëri prej tyre është një oficer aktual i Drejtorisë së Përgjithshme të Inteligjencës (GUR) të Ministrisë së Mbrojtjes së Ukrainës, ndërsa tjetri një ish-punonjës i zbatimit të ligjit.

Ngjarja në Monako ndodhi më 29 qershor, rreth orës 21:00, kur një shpërthim plagosi biznesmenin Vadim Yermolaev, partneren e tij dhe djalin 13-vjeçar. Dy të rriturit, sipas raportimeve, ndodhen ende në gjendje të rëndë shëndetësore.

Pas shpërthimit, autoritetet nisën një operacion të gjerë hetimor për identifikimin e personit që vendosi pajisjen shpërthyese. Hetuesit u bazuan në pamjet e kamerave të sigurisë dhe dëshmitë e personave që ndodheshin pranë vendit të ngjarjes.

Më 3 korrik, Interpoli lëshoi një urdhër kërkimi ndërkombëtar për Anastasia Berezovskayan, pasi autoritetet e Monakos e identifikuan atë si të dyshuarën kryesore për atentatin.

Vadim Yermolaev është një biznesmen nga Dnipro, themelues i grupit tregtar dhe industrial “Alef” dhe një prej zhvilluesve më të mëdhenj të pasurive të paluajtshme në qytet. Ai ka qenë pjesë e listës së 100 personave më të pasur në Ukrainë sipas revistës “Forbes”. Në vitin 2019, ai hoqi dorë nga shtetësia ukrainase pasi mori një pasaportë qipriote.