Teatri Kombëtar, Basha: Gjykata Kushtetuese foli, radhën e ka SPAK

Kryetari i Partisë Demokratike, Lulzim Basha në një reagim pas vendimin të Gjykatës Kushtetuese për Teatrin Kombëtar, i ka bërë thirrje Strukturës së Posaçme kundër Korrupsionit dhe Krimit të Organizuar që të veprojë.

“Gjykata Kushtetuese foli, radhën e ka SPAK”, shkruan Basha në Twitter. Kreu i PD publikisht mbështet idenë për rindërtimin e godinës së Teatrit Kombëtar në vendin ku ishte dhe me të njëjtën strukturë.

Gjykata Kushtetuese foli, radhën e ka SPAK!#atykuishteashtusiçishte pic.twitter.com/DoMIvtvjnW

— Lulzim Basha (@lulzimbasha_al) July 2, 2021

Në një deklaratë për mediat, njësoj si kryedemokrati Basha, edhe Sekretari i Përgjithshëm i PD-së, Gazment Bardhi tha se pas vendimit të marrë nga Gjykata Kushtetuese është radha e SPAK për të vepruar, teksa apeloi për arrestimin e kryetarit të bashkisë, Veliaj.

Ai përshëndeti vendimin e marrë duke e cilësuar si “mbrojtje për Teatrin Kombëtar”, ndërsa cilësoi si të paligjshëm çdo vendim të marrë nga Bashkia Tiranë.

Gjykata Kushtetuese ka shfuqizuar vendimin e Këshillit të Ministrave për kalimin e tokës së Teatrit Kombëtar në Bashkinë e Tiranës si dhe ka pezulluar veprimet për ndërtimin e godinës së re.

Si rrjedhojë toka e teatrit i rikthehet Ministrisë së Kulturës, gjë e cila i heq të drejtën Bashkisë së Tiranës për të vazhduar me procedurat e ndërtimit të godinës së re.

Godina e Teatrit Kombëtar u shemb më 17 maj të vitit të kaluar pas një rezistence të gjatë të Aleancës për Mbrojtjen e Teatrit Kombëtar që kundërshtonin prishjen e ndërtesës me argumentin se përbën trashëgimi kulturore.

LEXONI GJITHASHTU:

Gjykata Kushtetuese rrëzon vendimin e Qeverisë për Teatrin Kombëtar