Gjykata merre vendimin, gruaja e kryeministrit spanjoll do të dalë në gjyq për akuzat për përvetësim fondesh

Gruaja e kryeministrit të Spanjës, Begona Gomez do të dalë në gjyq para një jurie për akuzat e ushtrimit të ndikimit dhe përvetësimit të fondeve. Kështu vendosi një gjykatë të enjten, në një pengesë të mëtejshme për qeverinë e përfshirë në muaj të tërë hetimesh dhe skandalesh për korrupsion.

Ekipi mbrojtës i Begona Gomez kishte nisur një apel, duke i kërkuar gjykatës së lartë të Madridit të rrëzonte akuzat e ngritura kundër saj, të cilat ajo i mohon, dhe të hiqte urdhrat e tjerë të vendosur ndaj saj nga një gjykatë më e ulët muajin e kaluar.

Gjykata e Madridit rrëzoi një akuzë të tretë për korrupsion në biznes kundër Gomez dhe hoqi urdhrin e gjykatës së shkallës së parë që e ndalonte atë të largohej nga vendi, duke e detyruar të paraqitej rregullisht në gjykatë dhe duke i kërkuar asaj të dorëzonte pasaportën.

Por pjesa më e madhe e çështjes mbeti kundër saj – sfida më serioze ligjore me të cilën përballen familja dhe bashkëpunëtorët e ngushtë të kryeministrit socialist Pedro Sanchez.

Prokurorët e shtetit i kishin kërkuar gjithashtu gjykatës të rrëzonte akuzat – të cilat bazoheshin në një ankesë ligjore të bërë nga grupet e ekstremit të djathtë që akuzonin Gomezin se kishte përdorur pozicionin e saj si bashkëshorte e kryeministrit për të siguruar kontrata pune.

Sanchez – i cili për pak kohë mendoi të jepte dorëheqjen në prill të vitit 2024 pasi gjyqtari hetues Juan Carlos Peinado hapi hetimin ndaj Gomez – e ka mbrojtur publikisht familjen e tij, duke thënë se çështjet janë të motivuara politikisht dhe të nxitura nga kundërshtarët e tij.

“Begona Gomez është e pafajshme”, tha zyra e Sanchez në një deklaratë të enjten.

“Kushdo që është i njohur me hetimin e di se ky është një rast i motivuar politikisht, që buron nga një akuzë e rreme e bërë nga një organizatë e ekstremit të djathtë, bazuar në lajme të rreme, dhe motivimi i vetëm i së cilës është të ngacmojë dhe persekutojë gruan e kryeministrit.”

Më herët këtë javë, një gjykatë dënoi vëllain e Sanchez për shkelje administrative dhe e ndaloi atë të mbante një detyrë publike për nëntë vjet.

Por vendimi i së enjtes konfirmoi se Gomez do të gjykohet nga një juri qytetare, një procedurë e rezervuar në Spanjë për një numër të kufizuar veprash penale, përfshirë ushtrimin e ndikimit.

Sipas kodit penal të Spanjës, ushtrimi i ndikimit nga një individ privat dënohet me burgim nga gjashtë muaj deri në dy vjet, ndërsa përvetësimi mund të dënohet deri në tetë vjet burgim në raste të rënduara.