Kriza klimatike, thatësira ekstreme godet Evropën

Një analizë shkencore ka zbuluar se nxehtësia ekstreme e shkaktuar nga kriza klimatike po e than Evropën gjatë verës dhe po e intensifikon thatësirën që po godet kontinentin.

Valët rekord të të nxehtit nënkuptonin se atmosfera e nxehtë avulloi fuqishëm ujin nga lumenjtë, liqenet, tokat dhe bimët – kushte të tilla u bënë 80 herë më të mundshme nga ngrohja globale në Evropën Perëndimore dhe 40 herë më të mundshme në Evropën Lindore, tregoi studimi.

Niveli i thatësisë së tokës në perëndim u bë pesë herë më i mundshëm nga ndotja nga lëndët djegëse fosile në perëndim dhe 11 herë më i mundshëm në lindje.

Thatësirat zakonisht janë lidhur me reshje të pakta shiu, por dimri më i fundit i Evropës Perëndimore ishte një dim i lagësht. Shkencëtarët thanë se kriza klimatike po e ripërcakton thatësirën në Evropë, me temperaturat e larta si faktorin kyç këtë verë. Thatësira e sotme në Evropën Perëndimore klasifikohet si “ekstreme”, por do të kishte qenë “e moderuar” në botë para krizës klimatike, sipas analizës.

Thatësira u vlerësua deri në fund të qershorit, në fillim të verës, por tashmë po ka ndikime të mëdha. Shumë vende kanë zbatuar kufizime emergjente në përdorimin e ujit, me shumicën e pjesëve të Anglisë jugore që tani janë nën ndalimin e përdorimit të tubave të ujit.

Zjarre vdekjeprurëse kanë përfshirë Spanjën dhe Francën dhe fermerët janë goditur rëndë, duke u përballur me disa nga tokat më të thata të regjistruara ndonjëherë. Rreth 9 milionë ton drithëra pritet të humbasin në të gjithë Evropën, me korrjen më të keqe të misrit që pritet në Francë, dhe fermerët rumunë që do të humbasin mbi një milion hektarë të mbjella.

Lumenjtë po pakësohen në të gjithë Evropën, duke ulur prodhimin e energjisë së pastër hidroelektrike dhe duke kufizuar anijet e mallrave. Rhein në Lobith në Holandë tani është më i ulët se niveli minimal i parë në verën e nxehtë të vitit 1976. Shkencëtarët paralajmëruan se kjo përçarje mund të rrisë çmimin e ushqimit dhe energjisë, duke goditur më rëndë familjet me të ardhura të ulëta.

Shefi i OKB-së për klimën, Simon Stiell, tha se thatësirat që përkeqësohen janë një alarm i kuq i painjorueshëm se planeti ynë po mbinxehet.

“Derisa njerëzimi të ndalojë së djeguri sasi të mëdha qymyri, nafte dhe gazi, këto thatësira brutale të shkaktuara nga klima do të bëhen vetëm më të rënda dhe më të kushtueshme për familjet dhe ekonomitë e tëra njësoj. Por zgjidhjet janë po aq të qarta: të kalohet shumë më shpejt në energjinë e rinovueshme”, tha ai.