Ish-presidenti Hernandez do të kthehet në Honduras pas faljes nga Trump

Ish-presidenti i Hondurasit, Juan Orlando Hernandez do të kthehet në Honduras të dielën, tetë muaj pasi Presidenti i SHBA-së Donald Trump e fali atë ndërsa ai po vuante një dënim me 45 vjet burg në SHBA për trafik droge dhe armësh.

Hernandez, i cili shërbeu dy mandate radhazi si president nga viti 2014 deri në vitin 2022, do të zbarkojë në Aeroportin Ndërkombëtar Palmerola, rreth 60 km në veriperëndim të kryeqytetit, Tegucigalpa, me një fluturim privat.

Ai pritet të paraqitet para gjykatës më 3 gusht për t’u përballur me akuzat për mashtrim dhe pastrim parash. Një urdhër arresti i lëshuar kundër tij u pezullua në qershor, që do të thotë se ai nuk do të ndalohet pas mbërritjes.

Në një intervistë me Reuters të mërkurën, Hernandez tha se do të kërkonte që akuzat të rrëzoheshin.

“Po numëroj ditët derisa të mund të përqafoj nënën time, gruan time Ana, fëmijët e mi, mbesat e mia dhe anëtarët e tjerë të familjes, si dhe çdo mik që na mbështeti me lutjet e tyre”, shtoi ai.

“Nuk ishte e lehtë. Procesi ka qenë jashtëzakonisht i vështirë… dhe atë që përjetova në burg, vërtet nuk do t’ia dëshiroja askujt.”

Sfidat ligjore të Hernandezit datojnë që nga kapja e tij në Tegucigalpa në shkurt 2022 dhe ekstradimi i mëvonshëm në SHBA dy muaj më vonë.

Në vitin 2024, një gjyqtar amerikan e dënoi atë me 45 vjet burg për akuza që lidhen me trafikimin e drogës dhe armëve – akuza që ai i ka mohuar gjithmonë.

Falja e dhënë nga Trump në fund të vitit 2025, mes zgjedhjeve presidenciale të kontestuara ngushtë në Honduras, bëri që një kandidat presidencial dhe të tjerë të ankoheshin për ndërhyrjen e SHBA-së në procesin politik.

Megjithatë, falja nuk ndikoi në akuzat në Honduras. Një hetim për korrupsion i njohur si “Pandora II” ka akuzuar Hernandezin dhe zyrtarë të tjerë të profilit të lartë për devijimin e gati 11 milionë dollarëve nga fondet shtetërore në fushata politike midis viteve 2010 dhe 2013.

Një pjesë e këtyre parave dyshohet se është përdorur për fushatën e parë presidenciale të Hernandezit. Akuzat kundër ish-Presidentit Porfirio Lobo dhe ish-ministrit të financave Wilfredo Cerrato – të dy të përfshirë në hetim -u rrëzuan.

Hernandez tha se nuk e përjashton mundësinë e kandidimit përsëri për një detyrë, megjithëse shtoi se kjo nuk ishte në planet e tij të menjëhershme.

Por ai tha se ishte i përgatitur të ndante përvojën e tij politike me ata që janë në pushtet.

 “Ne kemi një udhëheqje të re në partinë tonë, ne duam t’i mbështesim ata”, tha ai.