Lihen në burg mjekët dhe infermierja që morën ryshfet për të plagosurin në Velipojë

Është dhënë masa arrest me burg për dy mjekët e Spitalit të Traumës dhe infermieren në Shkodër, që u akuzuan se kanë marrë para për të operuar 17-vjeçarin e plagosur në ngjarjen e Velipojës.

Kjo masë u dha sot nga Gjykata e Shkallës së Parë në Shkodër, ndërsa dy mjekët dhe infermierja u arrestuan të hënën.

Mjeku Ervin Sulaj ka mohuar se ka lidhje me marrje ryshfeti, duke thënë se ai dhe kolegu i tij janë marrë vetëm me operacionin e të plagosurit Elmidin Dyli. Ndërkohë mjeku tjetër, kirurgu Serdi Memini, nuk ka qenë i pranishëm në sallë për shkak se është shtruar në spital në Tiranë dhe nuk është në gjendje të mirë shëndetësore, por është përfaqësuar nga avokati i tij.

Avokatët mbrojtës të dy mjekëve kërkuan që ndaj të dyshuarve të mos caktohet asnjë masë sigurie dhe madje të cilësohet i paligjshëm arrestimi i tyre, por gjykata nuk e pranoi këtë kërkesë duke i lënë me masën e sigurisë “arrest me burg”.

Ka qenë bashkëshortja e shtetasit Fatbardh Dyli ajo e cila ka zhvilluar një bisedë telefonike me infermieren e Shkodrës, Diellë Macaj, duke i thënë asaj se do t’i çojnë dhuratë 50.000 mijë lekë doktorit, por pa përmendur emrin se cilit prej tyre. Infermierja e ka mbështetur në atë bisedë duke i thënë se “është mirë t’ia dërgosh dhuratën”.

Me 27 qershor në Velipojë u vranë katër persona dhe u plagosën dy të tjerë, mes tyre edhe 17-vjeçari Elmidin Dyli.

LEXONI GJITHASHTU:

• Arrestohen 2 mjekë të “Traumës”, akuzohen se morën para për të operuar të plagosurin në Velipojë
• Si nisi konflikti në Velipojë që la pas katër viktima dhe dy të plagosur