Kryebashkiakët përballë drejtësisë nga akuzat për korrupsion te problemet me dekriminalizimin

Fatos Tushe është i pari kryebashkiak në krye të detyrës që akuzohet nga SPAK për korrupsion dhe shpërdorim detyre që nga krijimi i kësaj strukture të re në sistemin e drejtësisë.

Tre ish-kryebashkiakë të tjerë, Zamira Rami e Gjirokastrës, Rexh Byberi i Tropojës dhe Adem Lala i Hasit janë akuzuar nga SPAK për shpërdorim detyre pas mbarimit të mandatit.

Deri tani Zamira Rami është e vetmja që është dënuar me një vit burg për abuzim me detyrën nga Gjykata e Posaçme kundër Korrupsionit.

Ish-kryebashkiakun e Tropojës, Rexh Byberi që në mars të këtij viti, është në hetim nga SPAK pëë dhënie leje ndërtimit në një vend të mbrojtur në komunën Margegaj.

Ndërsa në qershor të vitit 2020, SPAK nisi hetimet për kryebashkiakun e Hasit, Adem Lala me akuzën e shpërdorimit të detyrës, për privatizimin e një ndërtesë, i cili më pas u anulua. Por në shtator 2020, Gjykata e Antikorrupsion e shpalli të pafajshëm.

Në radhët e kryebashkiakëve që u përballën me drejtësinë është edhe Shpëtim Gjika, ish-kryetari i bashkisë së Vlorës, i cili në vitin 2015 u arrestua si i dyshuar për shpërdorim detyre.

Në vitin 2018, ish-kryebashkiaku i Kavajës, Elvis Roshi u akuzua për fshehjen e dënimit në formularin e dekriminalizimit. Gjika u shpall i pafajshëm ndërsa Roshi u dënua me 60 orë punë në komunitet.

LEXONI GJITHASHTU:

• Arrestohet kryetari i Bashkisë së Lushnjës, Fatos Tushe
• “PS nuk është mbulesa e askujt”, kryeministri Rama reagon pas arrestimit të kryebashkiakut të Lushnjës
• “Të korruptuarit në burg, sado të pushtetshëm”, ambasadorja Kim reagon pas arrestimit të kryebashkiakut të Lushnjës