Franca këshillon qytetarët të shmangin udhëtimet në Portugali dhe Spanjë

Franca u ka kërkuar qytetarëve të saj që të shmangin udhëtimet në Portugali dhe Spanjë gjatë kësaj vere, për shkak të shqetësimit në rritje për përhapjen e shpejtë të variantit Delta të COVID-19.

Qeveria franceze tha se nuk e përjashton vendosjen e kufizimeve për udhëtimet në këto dy vende.

“Për ata që nuk kanë rezervuar ende pushimet e tyre, shmangni përfshirjen e Spanjës dhe Portugalisë në planet tuaja,” tha sekretari francez i Shtetit për Çështjet Evropiane, Clément Beaune.

“Kjo është një këshillë dhe një rekomandim për të cilin unë insistoj. Më mirë të qëndroni në Francë, sesa  të udhëtoni në vende të tjera. Kemi të bëjmë me një situatë shqetësuese, veçanërisht në Portugali, e cila për fat të mirë po merr masa”, shtoi ai.

Gjatë fjalës së tij, Clément Beaune qortoi Spanjën për faktin që lejoi të hyjnë në vend turistë me certifikata vaksinimi që nuk janë certifikuar nga Agjencia Evropiane e Barnave (EMA).

Thirrja e qeverisë franceze bie në kontrast me vendimin e fundit të Gjermanisë për të lehtësuar kufizimet për qytetarët që mbërrijnë në vend nga Portugalia.

Qasjet e ndryshme nxjerrin në pah mospërputhjet e vazhdueshme në lidhje me udhëtimet midis vendeve anëtare në Bashkimin Evropian, pavarësisht nga lëshimi i certifikatës së udhëtimit COVID në bllokun evropian.

LEXONI GJITHASHTU:

• Vala e katërt e COVID, ekspertët në Francë paralajmërojnë rrezikun nga varianti Delta
• Hiqen kufizimet për shqiptarët që duan të udhëtojnë drejt Spanjës
• Portugalia rikthen kufizimin e lëvizjeve për shkak të përhapjes së variantit Delta të COVID-19