Milionat e uniformave, kompania që vesh policët mori 38 mln euro për 8 vjet

Kompania që fitoi tenderin e uniformave të Policisë së Shtetit në vitin 2020 “D&E SHPK”, ka përfituar kontrata publike me vlerë 38 milionë euro nga viti 2012.

“D&E SHPK” u regjistrua në treg në vitin 2007 me veprimtari kryesore prodhimin dhe shpërndarjen e uniformave ushtarake.

Emri i saj u lakua në vitin 2012, për tenderin e uniformave të ushtrisë, me vlerë 14 mln euro dhe për një lokal që mori brenda mjediseve të spitalit ushtarak, kur ministër i Mbrojtjes ishte Arben Imami.

Asokohe, kur akuzat vinin nga Partia Socialiste, D&E firmosi nën qeverisjen e Partisë Demokratike kontrata 15 milionë euro, dhe deri në vitin 2020 kur akuzat ndërruan krah politik, kjo firmë ka përfituar nga thesari 23.5 mln euro transaksione për kontratat e lidhura, pa llogaritur paratë e uniformave të Policisë së Shtetit.

“OpenProcurement”, një organizatë që merret me klasifikimin e prokurimeve publike, 15 muaj më parë sinjalizoi korrupsion të mundshëm në garën për uniformat e policisë, çka pasoi edhe me arrestime nga SPAK për zyrtarët në Ministrinë e Brendshme.

  LEXONI GJITHASHTU:

• Tenderi për uniformat e policisë, arrestohen disa zyrtarë dhe ish-zyrtarë të Ministrisë së Brendshme
• Kallëzimi në SPAK, dy kompanitë garuese për tenderin 25 mln € përdorën të njëjtin numër telefoni