Ambasadorja Yuri Kim përshëndet arrestimet e zyrtarëve në Ministrinë e Brendshme

Të abuzosh me tenderët është njësoj si të vjedhësh qytetarët. Ky ishte reagimi i ambasadores amerikane Yuri Kim pas operacionit të SPAK që çoi në arrestimin e zyrtarëve dhe ish-zyrtarëve të Ministrinë e Brendshme lidhur me tenderin për uniformat e policisë.

Përmes një postimi në rrjetin social “Twitter”, ambasadorja përgëzon operacionin e strukturës së posaçme kundër korrupsionit teksa e cilëson krim grabitjen e qytetarëve për të mbushur xhepat e zyrtarëve.

“Është mirë të shohësh SPAK të ndërmarrë veprime të tjera kundër korrupsionit. Abuzimi apo manipulimi me proceset e prokurimeve publike është e njëjta gjë me vjedhjen ndaj të gjithë qytetarëve shqiptarë (përfshi qytetarët amerikanë, taksat e të cilëve sigurojnë asistencë për Shqipërinë), me qëllim që të fryjnë xhepat e tyre apo të “miqve” të tyre. Është krim”, shkruan ambasadorja amerikane.

Nëntë zyrtarë dhe ish-zyrtarë të Ministrisë së Brendshme u arrestuan sot pas një operacioni të udhëhequr nga SPAK lidhur me abuzimet në tenderët publikë.

Më konkretisht, bëhet fjalë për tenderin e uniformave të policisë e vitit 2020, vlera e të cilit arrin në 25 milionë euro.

LEXONI GJITHASHTU:

• Tenderi për uniformat e policisë, arrestohen disa zyrtarë dhe ish-zyrtarë të Ministrisë së Brendshme
• Kallëzimi në SPAK, dy kompanitë garuese për tenderin 25 mln € përdorën të njëjtin numër telefoni