Helmimi masiv në Kosovë, analiza e ujit del brenda normave të lejuara

Drejtori i Institutit Kombëtar të Shëndetësisë Publike në Kosovë, Naser Ramadani ka reaguar pas dyshimeve se mbi 800 persona janë infektuar në Deçan nga uji i pijshëm.

Ai thotë se nga analizat e bëra vërtetohet se nuk ka tejkalim të vlerave normale të përcaktuara me standardet evropiane.

“Janë marrë menjëherë 6 mostra të ujit në Prilep, Irzniç, Gramaqel, Gllogjan, Baballoç, Rastavicë dhe nga secili fshat mostrat janë dërguar në laboratorët e higjienës, mikrobiologjisë të Institutit Rajonal të Pejës. Mostrat janë dërguar për rezultate për analiza fiziko-kimike dhe menjëherë mbrëmjen e djeshme janë bërë gati dhe mostrat kanë rezultuar në kufij të lejuar në përputhje me parametrat e përcaktuara”, tha ai.

Por për rezultatet përfundimtare, z. Ramadani shtoi se duhet të bëhen hulumtime laboratorike gjatë orëve në vijim.

Gjatë ekzaminimeve paraprake, ai tha se ka anëtarë të familjes, të cilët pavarësisht se kanë konsumuar të njëjtin ujë nuk kanë pasur simptoma helmimi.

Kryetari i Komunës së Deçanit, Bashkim Ramosaj ka hedhur dyshime se helmim i ujit mund të jetë i qëllimshëm, pasi siç thotë ai është hera e dytë brenda një muaji që përsëritët e njëjta gjë.

LEXONI GJITHASHTU:

• Kosovë, mbi 800 persona në spital, dyshohet për helmim të qëllimshëm
• Masakra e Srebrenicës, Vjosa Osmani: Akte të tilla duhet të marrin gjykimin e drejtësisë
• Kosova paralajmëron rishikim të masave anti-COVID pas shfaqjes së variantit “Delta”