Mosdeklarimi i të ardhurave, qytetarët më të gjobitur se kompanitë

1,043 individë të dypunësuar gjatë vitit 2020 nuk e plotësuan deklaratën vjetore të të ardhurave.

Sipas ligjit, afati i fundit për plotësimin ishte data 30 qershor dhe këta persona automatikisht kanë marrë gjobë në masën e 5 mijë lekëve, ose 5.2 milionë lekë gjithsej.

Këta të fundit, bashkë me shlyerjen e detyrimit që sjell deklarimi, nëpërmjet urdhërpagesës që duhet të printohet nga sistemi duhet të paguajnë në bankë edhe gjobën.

Sipas tatimeve detyrimin për të plotësuar deklaratën DIVA këtë vit e kishin 57,700 persona dhe në fazën e parë, deri në 30 prill, e kishin plotësuar vetëm 23 mijë, por ky afat u shty me akt normativ për t’u dhënë një mundësi të dytë atyre në mënyrë që të mos penalizoheshin.

Por, nëse për qytetarët kjo mundësi u kufizua me dy muaj, tatimet nuk kanë ndjekur të njëjtën qasje edhe për bizneset në rastin e fiskalizimit.

Për këta të fundit, është lënë afat deri në fund të këtij viti, në mënyrë që të integrojnë sistemin e ri fiskal, por deri ditën e fundit të afatit në 1 korrik,  me certifikatën e re elektronike ishin pajisur vetëm 25 për qind e bizneseve nga 51 mijë që duhet t’i nënshtrohen procesit.

LEXONI GJITHASHTU:

• 10 kompanitë që përfituan më shumë nga fondet publike gjatë vitit 2020 në Shqipëri
• “70% e tenderëve me probleme”, Rama-ministrave: Nëse nuk reagoni pas rekomandimeve, do shkoni në SPAK