Takimi Kurti-Vuçiç, faza tjetër e dialogut në Bruksel më 19 korrik

Takimi i radhës mes Kryeministrit të Kosovës, Albin Kurti dhe Presidentit të Serbisë, Aleksandar Vuçiç do të zhvillohet më 19 korrik. Lajmi u bë i ditur gjatë një konference për shtyp nga zëdhënësi i Bashkimit Evropian, Peter Stano.

“Ky takim i nivelit të lartë të dialogut do të fokusohet në diskutimin për progresin e arritur – për hapat e ardhshëm në dialog, i cili është shumë i rëndësishëm për perspektivën evropiane të Kosovës dhe Serbisë,” – u shpreh Stano.

Ky është takimi i dytë mes Kurtit dhe Vuçiç në Bruksel pas 15 qershorit ku palët theksuan përplasjet mes tyre.

Javën e kaluar në Bruksel u takuan zëvendëskryeministri i Kosovës për dialog, Besnik Bislimi, me drejtorin e Zyrës për Kosovën në Qeverinë e Serbisë, Petar Petkovic, por pa shënuar ndonjë zhvillim.

Pala serbe këmbëngul që Kosova të zbatojë marrëveshjen e Brukselit për formimin e Asociacionit të komunave me shumicë serbe, ndërsa pala e Kosovës vlerëson se janë nënshkruar disa marrëveshje që nuk respektohen plotësisht nga Serbia.

LEXONI GJITHASHTU:

• Opozita në Kosovë e cilëson dështim të plotë qëndrimin e Kurtit përballë Vuçiçit
• Vuçiç tregon momentet e tensionit gjatë takimit me Kurtin: Më provokoi
• Ramush Haradinaj: Kurti po e fut dialogun me Serbinë në shtigje të rrezikshme për vendin
• Pas takimit Kurti-Vuçiç, reagon i dërguari i BE-së, Miroslav Lajçak