Helmimi në Deçan, IKSHPK: Uji nga ujëmbledhësi Drenocit është jo i pijshëm

Instituti Kombëtar i Shëndetësisë Publike të Kosovës, pas analizave ka konstatuar se uji i ujëmbledhësit të Drenocit nuk është i pijshëm.

IKSHPK thekson është bërë analiza fiziko-kimike dhe bakteriologjike e tri mostrave të ujit nga rrjeti i ujësjellësit, i cili i furnizon fshatrat Prilep, Irzniq, Gllogjan dhe në to kanë rezultuar prania e bakterieve koliforme dhe E.coli.

“Në mostrat e ujit të ujësjellësit të datës 13. 07. 2021 nga rajoni i Deçanit, pas kultivimit në terrene ushqyese përmes teknikës së identifikimit me MALDI-ToF, në laboratorët e IKSHPK-së në Prishtinë, janë identifikuar disa baktere jo patogjene. Këto baktere mund të japin indikacion për kontaminim të ujit të pijshëm, kurse në ujëmbledhësin e Drenocit janë izoluar vlera të shtuara të baktereve koliforme dhe E.coli. Uji nga ujëmbledhësi i Drenocit deklarohet jo i pijshëm”, thuhet në njoftimin e Institutit Kombëtar të Shëndetësisë Publike të Kosovës.

3 ditë më parë, Komuna e Deçanit shpalli gjendjen e emergjencës, pasi mbi 1500 persona u helmuan dhe morën ndihmë mjekësore.

Dyshime ka se helmimi ka ardhur nga uji, por prokuroria për këtë çështje po heton në disa pista.

Kryeprokurori i Pejës, Agim Kurmehaj deklaroi se për hetimet ka kërkuar nga policia një raport urgjent mbi praninë e dy shtetasve serbë në këtë zonë.

Sakaq, kreu i Komunës së Deçanit, Bashkim Ramosaj u shpreh se ujësjellësin e kësaj zone nuk do ta menaxhojë më kompania private, por shteti.

LEXONI GJITHASHTU:

• Prokuroria kërkon raport urgjent mbi praninë e dy shtetasve serbë në Deçan
• Helmimi në Deçan, analizat zbulojnë praninë e baktereve në ujin e pijshëm
• Mbi 900 të helmuar, Deçani shpall gjendjen e emergjencës, ndërpritet furnizimi me ujë